Fantasíumynd - Elísa Ósk

Ég rakst á skemmtilega grein um daginn, eða reyndar fyrir frekar löngu en þar var myndlistakonan hún Elísa Ósk í brennipunkti. Ég sá myndir frá henni, nánar tiltekið fantasíumyndir og þær voru hreint út sagt stórkostlegar. Mikil vinna sem hafði greinilega farið í gerð þeirra og skemmtileg saga á bak við hverja og eina mynd.

Ég heillaðist það mikið að mig langaði að eignast mína eigin og sendi strax á Elísu póst í gegnum Facebook. Ég fékk nánustu vini mína til þess að lýsa mér í nokkrum orðum, tók svo lýsingarnar saman og sendi á Elísu ásamt mynd. Elísa fór svo beint í það að vinna að myndinni minni sem ég er ótrúlega sátt með. Það sem mér finnst einnig vera gríðarlegur kostur er að myndirnar eru á viðráðanlegu verði svo þetta er tilvalið sem gjöf - persónulegt og öðruvísi!

Í framhaldi af þessu fékk ég að senda nokkrar spurningar á Elísu. Hún tók vel í það svo hér að neðan getið þið séð stutt brot úr viðtalinu.

Hver er menntun Elísu? Ég útskrifaðist úr Borgarholtsskóla af listnámsbraut (margmiðlunarhönnun) einnig með stúdentspróf árið 2006. Útskrifast úr Háskóla Íslands sem myndmenntakennari árið 2011. 

Hver er Elísa Ósk Viðarsdóttir? Elísa Ósk Viðarsdóttir er mamma, myndmenntakennari í Árbæjarskóla, myndlistarkona og í mínum frítíma æfi ég crossfit og læri tattoo art.

Ég spurði Elísu einnig að því hvenær áhuginn vaknaði fyrir myndlistinni en hún svaraði: "Ég hef alla mína tíð haft mikinn áhuga á myndlist og hef alltaf verið að teikna eitthvað. Eftir að ég meiddist og þurfti að hætta í handbolta og fótbolta, þá hafði ég mikið meiri tíma en áður. Það var ekki fyrr en þá, fyrir einu og hálfu ári síðan, sem ég byrjaði að teikna af alvöru." Hvernig kom hugmyndin að gerð fantasíumynda upp á borðið? Hugmyndin að fantasíumyndunum byrjaði þannig að ég var að teikna gjöf og langaði að tengja teikninguna við persónuna, þá datt mér í hug að blanda myndum (táknum) í tengslum við t.d. áhugamál eða stjörnumerki hvers og eins inn í andlitsmyndina sjálfa. Í verkunum vinn ég með vatnsliti og blýatnsteikningu í blandaðri tækni.

Ég þakka Elísu Ósk, þessari frábæru listakonu kærlega fyrir þessi fínu svör. Ef þið viljið sjá fleiri verk eftir Elísu nú eða fjárfesta í ykkar eigin mynd að þá má hafa samband á Facebook síðu hennar: https://www.facebook.com/elisaoskmyndlist


Hér er svo myndin sem Elísa gerði af mér ásamt nokkrum öðrum sem má finna á Facebook síðunni.

Elísa Ósk. 

Hér má sjá myndina mína í vinnslu. 

Verk eftir Elísu.

Hér má svo sjá myndina sem Elísa teiknaði af mér en ég gæti ekki verið sáttari með útkomuna. Takk enn og aftur Elísa!

xo Unnur